Gel gülşeni tevhıde şu bülbül gibi ya Hu

Gel gülşen-i tevhide şu bülbül gibi ya Hü
Nalan olub Allah diyelim Hü diyelim Hü
Gözyaşı ile gül-bun-i aşka verelim su
Giryan olub Allah diyelim Hü diyelim Hü

Manend-i saba nefha edüb nefha-i Rahman
Olsan çemen-i dilde maarif güli handan
Bağ-ı melekuta per açup etmeğe seyran
Perran olub Allah diyelim Hü diyelim Hü

Bildik ki beka yol bize bu dar-ı fenada
Ahval-i bekayı görelim rah-i Huda’da
Bildirmeyelim kimseye esrarı kabada
Pinhan olub Allah, diyelim Hü diyelim Hü

Dergah-ı İlahi’de olub bende-i ferman
Meydan-ı mahabbetde idüb zikr ile cevlan
Cezbeyle sema eyleyelim vecd ile devran
Gerdan olub Allah diyelim Hü diyelim Hü

Emri tutalım eyleyelim terk-i menahi
Çıksun feleğe nefsimizin dude-i ahı
Tennur-i gönülde tutuşub aşk-i ilahi
Süzan olub Allah diyelim Hü diyelim Hü

Aşk ile yanub yanmayalım nar-ı cahime
Mevt irmeden ivvel girelim dar-ı naime
Beyt-i Hak olan zaviye-i kalb-i selime
Mihman olub Allah diyelim Hü diyelim Hü

Dilden çıkarub meşgale-i hubb-i sivayi
Can gözlerin açub görelim fevk-ı ulayı
Her yüzde temaşa edelim vech-i Huda’yı
Hayran olub Allah diyelim Hü diyelim Hü

Envar-ı tecellide olub mahv-ü perişan
Fani olalım tür-i tecelli gibi yeksan
Humhane-i Veysi’den içüb bade-i irfan
Sekran olub Allah diyelim Hü diyelim Hü

Bul Şemsi gibi aşk-ı Muhammed’le delili
Bil ateş ile sırr-ı gülistan-ı Halil’i
Musa gibi seyr etmeğe envar-ı celili
Püyan olub Allah diyelim Hü diyelim Hü